السلام عليكم
مرحبا بكم معنا في شهيوة جديدة من شهيوات موقعكم اذواقي ، اليوم جبت ليكم طريقة تحضير حلوى الباونتي لي نقدرو ناخدوها كتحلية في رمضان و لي كايحبوها الصغار و الكبار و كانقصد هادي
و الوصفة ديالنا غاتكون ساهلة و غادي طلع رخيصة بزاف على هاديك لي كانشرو من الحانوت
المقادير
- نصف لتر من الحليب سليم
- خمسة كؤوس ديال العنبة من الكوك
- كأس ديال العنبة من السنيدة
- 250 غرام ديال الشوكولاتة قطع
- و يمكن نديرو معاهم 3 ملاعق من الكريمة الثقيلة و لكن تبقى اختيارية
طريقة التحضير
أولا نحضرو الحليب المكثف
- غادي نديرو جوج كيسان ديال العنبة من الحليب في طنجرة
- و نضيف عليه كأس من السكر سنيدة
- نديروهم فوق نار مجهدة و نبقاو نحركو شوية
- بعدما الحليب ديالنا يسخن مزيان نقصو البوطة حتى لأقل قياس ممكن
- و نبقاو نحركو كل دقيقتين
- ضروري نبقاو بجانب الحليب و تكوم النار مهيلة و نحركوه كل دقيقتين و مانغفلوش عليه باش مايتخرقش
- نستمرو بالتحريك كل دقيقتين لمدة نصف ساعة حتى ياخد لينا الحليب اللون الكريمي و يعقاد
- نحطوه من فوق النار و نديروه فقنينة زجاجية و نديروه فالثلاجة حتى يبرد
- بعدما يكون برد لينا الحليب المكثف نخرجوه باش نخدمو بيه الحلوة ديالنا
ثانيا تحضير الحلوى
- ناخدو 4 كؤوس من الكوك و نديروهم فشي إناء
- نضيفو عليهم كأس و نصف من الحليب المكثفلي حضرنا
- ثم نخلطوهم مزيان باليدين أو بالخلاط
- في حالة ماكانش الخليط مجموع و كان مرخوف نزيدو الكوك تدريجيا حتى نحصلو على عجين متماسك و مجموع
- بعدها نبداو نقادو فالحلوة ديالنا
- ناخدو مغرفة صغيرة من الخليط و نشكلوها باليدين حتى تاخد الشكل لي فالصورة الفوق
- نستمرو فالعملية حتى نكملو الخليط كامل
- بعدها نوجدو حمام مريم باش ندوبو فيه الشكلاط
- بعدما ندوبو الشكلاط كامل
- ناخد قطعة من الحلوة لي شكلناها بيدينا و نغمسوها في الشكلاط حتى تغمر فيه مزيان و نخرحوها و نحطوها فشي صينية
- نستمرو في العملية حتى نكملو القطع كاملة
- بعدها ممكن نزوقو الحلوة بالشكلاط من الفوق كما في الصورة و لكن كايبقا اختياري فقط
- ندخلو الصينية لي درنا فوقها الحلوة للثلاجة و نخليوها حتى تبرد مزيان باش تكون واجدة
و هكذا حلوى الباونتي المشهورة ديالنا وجدات، نحتافضو بيها فالثلاجة أو فأي مكان بارد
نتمنى تكون عجباتكم الوصفة ديال اليوم لي جبتها من عند ناس أجانب و قدمتها بطريقة حصرية على موقعنا اذواقي
ماتنساوش تشتركو في المدونة باش يوصلكم الجديد و تابعو صفحتنا على الفيسبوك صفحة اذواقي لي كانحط عليها جديد الموقع و الروابط كذلك
بالصحة والعافية
تعليقات
إرسال تعليق