كيفية خسارة الوزن و الحصول على جسم متناسق في شهر رمضان

                   السلام عليكم 

 مرحبا بكم معنا على موقع اذواقي ، اليوم غادي ندويو على 

طريقة خسارة الوزن في شهر رمضان بالنسبة للناس لي باغين يرقاقو شوية، و بما أنها أيام حجر صحي مانقدروش نخرجو و نمارسو الرياضة شوية، فأنا جبت ليكم برنامج ساهل كايعتامد على الصيام بما أننا في شهر رمضان و غادي نخسرو الوزن و ونحسو بتحسن في الصحة ديالنا بشكل عام. 

    غادي نركزو بشكل كبير على التغذية و بالنسبة للتمارين المنزلية كاتبقى اختيارية و غادي ندويو عليها منين نسالو الجزء المتعلق بالتغذية. 

                     أولا: التغذية

بما أننا في شهر رمضان غادي نكتفو بوجبتين فقط و هما الفطور و السحور، و هاد الزوج وجبات غادي نفصلو فيهم بالتدقيق وحدة بوحدة. 

أولا الفطور لي خاصنا ضروري نبعدو فيه على الحلويات و الأكل المزيت أو المقلي و مانكتروش من الفواكه و نتجنبو الخبز الأبيض لي مصايب من الفورص، نتجنبو شرب كميات كبيرة من العصائر، مانديروش السكر فأي حاجة، و. غادي نعطيكم نموذج ديال فطور صحي لي نقدرو نعتامدو عليه فأيام رمضان

نموذج الفطور:

1. زلافة وحدة ديال الحريرة
2. 3 حبات ديال التمر
3. زوج بيضات
4. زوج كيسان ديال العصير واحد عصير بالحليب و آخر بالليمون و ضروري مانديروش فيهم السنيدة 
5. شلاضة مايكونش فيها لا مايونيز لا كتشب نديرو فيها غير زيت الزيتون 
6. سمك أو دجاج أو لحم يكونو مشويين أو طايبين فالفران
7. و ماخاصناش ناكلو الخبز في الفطور و مانديروش السكر فأي حاجة 

ثاني حاجة هي السحور، لي خاصو يحتوي على السوائل بشكل كبير 

نموذج للسحور:

1. كأس عصير بدون سكر 
2. نحاولو نديرو خبز ديال دقيق القمح الكامل و نستهلكوه في السحور بكمية متوسطة حينتي ضروري من الكربوهيدرات في النظام الغذائي ديالنا
3. ناكلو زيت الزيتون أو الزبدة البلدية مع الخبز ديال الدقيف الكامل
4. نشربو أتاي ناقس من السكر أو إذا استطعنا نحيدو السكر حتى من أتاي غايكون أفضل
5. ناخدو معاهم شوية ديال الزيتون الأسود

بالنسبة للسحور ماخاصناش نكترو من الماكلة و ضروري ماناكلوش و نعسو حينتي هاد الشي غايضر لينا المعدة ديالنا.

و أهم عنصر فهاد شي كامل هو الماء، حينتي الدراسات تبتات بلي استهلاك كمية كافية من الماء يساعد على حرق الدهون، داكشي لاش ضرورض فالفترة ما بين الفطور و السحور خاصنا نسهلكو كمية كافية من الماء، و غادي نشرح ليكم شحال غادي تحتاجو ديال الماء. 

بالنسبة للإنسان العادي كايحتاج حوالي لتر و نصف من الماء، و لكن كلما زاد الوزن زادت كمية المياه الضرورية للجسم 

مثال شخص وزنو 65 كيلو غرام غادي يحتاج لتر و نصف من الماء ، و شخص الوزن ديالو 80 كيلو غرام غادي يحتاج لترين و نصف من الماء

هكذا نكونو عرفنا أشنو خاصنا ناكلو و شنو لي خاصنا نتجنبو، و بتطبيق هذا النظام الغذائي نقدرو نخسرو  حوالي 3 كيلو غرام في رمضان و بدون أي مجهود، و في حالة بغيتي تخسر/ تخسري وزن أكثر فعليك بالتمارين المنزلية لي غادي نشرحوها الآن

             ثانيا: التمارين المنزلية

   بالنسبة للسيدات و البنات غادي نعتامدو على تمارين سهلة لي هي عبارة عن صعود الدرج

غادي تطلعي مع الدرج  5 مرات و تنزلي 5 مرات متتالية و تاخدي راحة 15 ثانية و نعاودو الكرة 3 المرات

غادي نخدمو هذا التمرين يوميا قبل الفطور أو بعد الفطور بساعتين

     بالنسبة للرجال أو الشباب فالأمر بسيط كذلك نخدمو كارديو أو التمارين القلبية لمدة 30 دقيقة يوميا، فالتمارين ديال الكارديو غادي نعتمدو على الحبل، نخدمو داكشي لي قدرنا عليه و ناخدو 10 ثواني راحة بين الجولات، و في حالة توفرو عندك الأوزان تقدر تخدم بيهم تمارين مقاومة بحال لاصال عادي و تحرق دهون أكثر، و بالنسبة لتمارين الأوزان أو الحديد تخدموهم 3 مرات في الأسبوع. 

إذا التزمنا بهذا البرنامج فأكيد أننا غادي نخسرو الوزن خلال شهر رمضان و لكن بشرط نطبوق تطبيق حرفي واخا صعيب شوية حيتاش الناس كايعجبهم ياكلو الحلويات في رمضان و لكن ضروري نلتزم باش نشوفو نتائج في أقرب وقت

و هكذا نكونو سالينا موضوع اليوم سمحو لي طولت عليكم شوية و لكن كان ضروري ندخل فالتفاصيل باش يجيكم التطبيق ساهل. نتمنى يكون عجبكم الموضوع و ماتنساوش تشاركوه باش ناس الأخرى تستافد كذلك و تابعو صفحتنا صفحة اذواقي على الفيسبوك باش تعرفو المواضيع لي كانشارك و الروابط راه ديما كايكونو تما. 

               و السلام