السلام عليكم
مرحبا بكم معنا في شهيوة جديدة من شهيوات موقعكم اذواقي ، اليوم جبت ليكم طريقة تحضير خبيزات معمرين ساهلين و اقتصاديين و كايتحضرو في وقت وجيز.
مقادير خبيزات معمرين
للعجين نحتاج
- 250 غرام دقيق الفورص
- 150 غرام دقيق الفينو
- ملعقة كبيرة من خميرة الخبز
- ملعقة كبيرة من السكر سنيدة
- زوج ملاعق كبار من زيت الزيتون
- قبسة ملح
- ماء دافئ
للحشوة نحتاج
- خمسة ورقات ديال الخص
- حبتين متوسطتين من الجزر
- علبة صغيرة من الطون
- مرتديلا متوسطة الحجم
- نصف كأس ديال العنبة من الزيتون مقطع حلقات
- مايونيز حسب الرغبة
طريقة تحضير خبيزات معمرين
- أولا نحضر العجين
- نغربلو الدقيف الفورص و الفينو و نوضعوهم في إناء
- نضيف عليهم الملح ثم السكر و الخميرة
- نخلطو النواشف مزيان
- ثم نضيف زيت الزيتون
- ثم نجمعو الخليط بماء دافئ حتى نحصلو على عجين متماسك و رطب
- نغطيو العجين ببلاستيك غذائي أو بلاستيك عادي و نخليوه يرتاح لمدة نصف ساعة
- بعدما يرتاح لينا العجين و يخمر نرشو سطح العمل بالقليل من الفينو
- ثم نسرحو العجين بالمدلك
- ناخدو طابع دائري أو زلافة و نقطعو العجين لخبيزات صغار
- نرشوهم بالقليل من الفينو و نغطوهم و نخلوهم يرتاحو لمدة 10 دقائق
- بعدما يرتاحو نسخنو المقلاة ديال الخبز و نطيبوهم
- بعدما نطيبو الخبيزات كاملين نمر لتحضير الحشوة
- نحكو الجزر ديالنا شرائح طوال
- نشلضو أوراق الخص لي عندنا
- نحكو المرتدلا شرائح طوال
- نصفيو علبة الطون من الزيت
- ثم نضع الجزو و الخص و الطون و المرتدلا و الزيتون مقطع حلقات في إناء
- و نضيف المايونيز
- ثم نخلطو كولشي مزيان
- نجيبو الخبيزات ديالنا و نفتحوهم بالسكين
- ثم نعمروهم بالحشوة لي وجدنا و نقدموهم
و هكذا الخبيزات معمرين ديالنا واجدين ، نتمنى تعجبكم الوصفة ديال اليوم و تشاركوها مع الناس العزاز عليكم ، ماتنساوش تابعونا على فيسبوك و إنستغرام باش توصلو بالجديد و خليو لينا تعليق كيف جاتكم الوصفة.
بالصحة والعافية
تعليقات
إرسال تعليق