السلام عليكم
مرحبا بكم معنا في شهيوة جديدة من شهيوات موقعكم اذواقي ، اليوم جبت ليكم طريقة تحضير بريوش معمر بالخضر و الفرماج سهل و اقتصادي و بمكونات متوفرة في المنزل و كايجي رطب و هشيش و لذيذ.
مقادير بريوش معمر بالخضر و الفرماج
للعجين نحتاج:
- 500 غرام دقيق الفورص
- ملعقة كبيرة من خميرة الخبز
- نصف كأس من زيت الزيتون
- ملعقة صغيرة خميرة الحلويات
- زوج ملاعق كبيرة حليب بودرة نيدو
- ملعقة صغيرة ملح
- ملعقة كبيرة ديال النافع
- ماء دافئ
للحشوة نحتاج :
- خمس حبات من الگرعة الخضراء كورجيت
- حبة متوسطة من البصل
- حبة فلفل أخضر
- ثلاث ملاعق كبيرة مورتديلا محكوكة أو كاشير
- فرماج مودزاريلا أو فرماج أحمر
- ملح و توابل
- صفار بيضة للدهن
طريقة تحضير بريوش معمر بالخضر و الفرماج
- أولا نحضرو العجين
- ناخدو الدقيق نغربلوه و نديروه في إناء
- نضيف عليه خميرة الخبز و السكر و الحليب
- ثم نضيف النافع و خميرة الحلويات
- نخلطو النواشف كاملين
- ثم نضيف الزيت و نخلطو شوية
- ثم نضيف الماء تدريجيا و نستمرو في العجن حتى تجمع لينا العجينة
- ضروري تكون العجينة مرخوفة و خفيفة و تكون كاتلصق في اليدين
- بعدما نجمعو العجينة ندهنوها بقليل من االزيت و نغطيوها ببلاستيك غذائي أو بلاستيك عادي و نخلوها ترتاح لمدة نصف ساعة
- ثانيا ندوزو نحضرو الحشوة بينما تخمر لينا العجينة
- غادي ناخدو البصلة و نشلضوها
- نقطعو الفلفلة قطع صغيرة
- ثم نقطعو الگرعة الخضراء دوائر
- نديرو ملعقتين من زيت الزيتون في المقلاة ثم نضيف البصلة
- نشرملوها شوية ثم نضيف الفلفلة
- بعدها نضيف الگرعة
- نستمرو في التحريك
- نضيف التوابل زنجبيل و خرقوم بلدي و إبزار و القليل من الكمون
- نضيف الملح حسب الذوق
- ثم نضيف القليل من الماء و نخلوهم يطيبو مزيان حتى ينشفو
- بعدما يطيبو نحطوهم و هوما مزالين سخان نضيف الفرماج و الكشير و نخلطو كولشي مزيان
- ثم نخلوهم يبردو شوية
- الآن نرجعو باش نخدمو العجينة
- ندهنو سطح العمل بالدقيق و نقطعو العجينة ديالنا و نشكلو كويرات صغار
- بعدما نشكلو الكويرات نجيبو الحشوة ديالنا
- نگرصو كل كويرة و غادي نحصلو على خبيزات صغار
- نوضعو الحشوة وسط الخبيزة ثم نجمعوها من الأطراف حتى نشكلو كويرة و نضغطو عليها قليلا و نديروها في اللاطة
- نستمرو في العملية حتي نكملو العجينة كاملة
- ناخدو صفار بيضة وحدة نطربوه و ندهنو بيه بريوش ديالنا من الفوق
- ثم ندخلوهم للفرن
- نطيبوهم من التحت ثم من الفوق حتى يتحمرو و نخرجوهم
و هكذا بريوش معمر بالخضر و الفرماج ديالنا واجد، نتمنى تعجبكم الوصفة ديال اليوم و تشاركوها مع الناس العزاز عليكم ، ماتنساوش تشتركو معنا في المدونة باش يوصلكم الجديد و خليو لينا تعليق على كيف جاتكم الوصفة، كذلك تابعونا على فيسبوك و إنستغرام باش توصلو بالجديد.
بالصحة والعافية
تعليقات
إرسال تعليق