السلام عليكم
مرحبا بكم معنا في وصفة جديدة من وصفات موقعكم اذواقي ، اليوم جبت ليكم طريقة تحضير مسمن مورق و خفيف و كايجي رائع و أحسن من مسمن ديال الزنفة.
مقادير المسمن
- 250 غرام دقيق الفورص
- 250 غرام من الفينو دقيق القمح الصلب
- نصف ملعقة صغيرة من الملح
- ماء دافئ
- القليل من الزيت
- القليل من الزبدة دائبة
طريقة تحضير المسمن
- أولا نغربلو الدقيق الفورص
- نوضعو دقيق الفورص في الإناء لي غادي نعجنو فيه و نضيف عليه الفينو
- نضيف الملح
- نخلطوهم مزيان حتى يمتزجو
- ثم نبدأ في إضافة الماء تدريجيا و نعجنو حتى نحصلو على عجين متماسك و رطب و مايكونش كايلسق في اليدين
- بالنسبة لكمية الماء متعلقة بنوعية الدقيق المستعمل و أهم حاجة هو نضيفو الماء تدريجيا و بشوية باش نحصلو على عجين متماسك و ماكايلسقش في اليدين
- بعدما يتجمع لينا العجين ندلكوه مزيان لمدة 3 دقائق
- ثم نغطيوه ببلاستيك و نخلوه يرتاح لمدة ساعة
- بعدما يرتاح لمدة ساعة نخرجو العجين ديالنا و نعاودو ندلكوه لمدة دقيقتين
- ثم نعاودو نغطوه ببلاستيك و نخلوه يرتاح لمدة 30 دقيقة حتى يولي العجين مرخوف و خفيف و ساهل في الخدمة
- بعدما يرتاح لينا العجين نخرجوه و ندهنو اليدين بالزيت باش نشكلو الكويرات
- ثم نقطعو من العجين غير باليدين ديالنا و نشكلو كويرات متوسطين الحجم
- بعدما نشكلو الكويرات ندهنوهم بالزيت من الفوق و نغطوهم و نتركهم يرتاحو لمدة 15 دقيقة
- بعدما يكونو رتاحو لينا الكويرات ندهنو سطح العمل بالقليل من الزيت باش نخدمو المسمن ديالنا
- ندهن اليدين بالزيت و ناخدو كويرة من العجين و نسرحوها مزيان حتى نحصلو على عجين رقيق بزاف
- ضروري نسرحو العجين حتى يولي كبير و رقيق بزاف
- ثم ندهن العحين بالقليل من الزبدة الدائبة و نرشوه بالقليل من الفينو
- نبدا نطوي من كل طرف و نحصلو على مستطيل و ثم نطويوه من كل طرف حتى نحصلو على مربع
- بعدها نعاودو نسرحو العجين مرة أخرى بنفس الشكل ثم نجمعوه حتى نحصو على مربع
- نخدمو الكويرات ديالنا كاملين بنفس الشكل
- بعدما نكملو الكويرات كاملين نديرو المقلاة فوق النار تسخن و ندهنوها بالقليل من الزيت
- يمكن استعمال مقلاة طيفال أو مقلاة ثقيلة بحال بحال
- بعدها نجيب هادوك المربعات لي شكلنا و نگرسوهم حتى نحصلو على الشكل ديال المسمن المعروف
- ثم نديرو المسمن ديالنا في المقلاة
- نخلوه شوية و نقلبوه ثم نخلوه حتى يبدا يتحمر و نقلبوه للجهة الأخرى ثانيا ثم نخلوه حتى يتحمر و نقلبوه ثاني للجهة الأخرى حتى يتحمر مزيان
- ثم نحيدوه من المقلاة
- نستمر في العملية حتي نكملو المسمن ديالنا كامل
و هكذا المسمن ديالنا واجد كايجي مورق و خفيف و لذيذ بزاف، نتمنى تكون عجباتكم الوصفة ديال اليوم و نتمنى تشاركوها مع الناس العزاز عليكم و ماتنساوش تابعونا على فيسبوك و إنستغرام باش توصلو بالجديد و خليو لينا تعليق كيف جاتكم الوصفة.
بالصحة والعافية
تعليقات
إرسال تعليق