السلام عليكم
مرحبا بكم معنا في شهيوة جديدة من شهيوات رمضان 2020 المقدمة من طرف موقعنا أذواقي ، اليوم جبت ليكم طريقة تحضير المسمن معمر أو محشو و بطريقة بسيطة.
مقادير المسمن معمر
- 500 غرام دقيق الفورص
- 250 غرام من الفينو دقيق القمح الصلب
- ملعقة صغيرة خميرة الحلوة
- معلقة صغيرة من الملح
- أربعة حبات بصل
- علبة صغيرة ديال الطون أو 200 غرام كفتة أو صدور الدجاج
- ملعقة كبيرة قزبر و معلقة معدنوس
- توابل و ملح
- ماء دافئ
طريقة تحضير المسمن معمر
أولا نحضرو العجين
- نديرو الدقيق الفورص مع الفينو فشي قصرية
- نضيفو عليهم ملعقة صغيرة خميرة الحلوة و ملعقة صغيرة ملح
- نخلطو كولشي مزيان
- ثم نبدأ بإضافة الماء الدافئ تدريجيا حتى نحصلو على عجينة متماسكة
- ندلكو العجين ديالنا جيدا
- ثم نغطيوه ببلاستيك غذائي و نخليوه يرتاح لمدة 30 دقيقة
ثانيا نحضرو الحشوة
- نشلضو البصلة ديالنا كاملة مزيان
- نديروها في المقلاة و نضيفو عليها زوج ملاعق زيت الزيتون
- في حالة بغينا نديرو الكفتة أو الدجاج غادي نشرملوهم مع البصلة أما في حالة بغينا نديرو الطون غادي نشرملو البصلة بوحدها
- بعدنا نكونو شرملنا البصلة مع الزيت نضيفو عليها التوابل لي بغينا ماشي بالضرورة توابل معينة
- و نضيف القزبر و المعدنوس
- و نضيف الملح كذلك
- ثم نخليهم شوية فوق البوطة ثم نحطوهم يبردو
- نصفي الطون من الزيت
- ثم نضيفوه على البصلة ديالنا و نخلطو مزيان
ثالثا تحضير المسمن معمر
- بعدما تكون العجين رتاحت مزيان
- ندهنو يدينا بالقليل من الزيت
- ثم نشكلو كويرات صغار
- ندهنوهم بالزيت و نغطيوهم لمدة 5 دقائق
- بعدما يرتاحوا لينا الكويرات
- ندهنو اليدين بالزيت
- ثم ناخدو بوحدة بوحدة و نگرسوهم مزيان حتى نحصلو على عجين رقيق بزاف
- ندهنو العجين ديالنا بالزيت
- ثم نطويوه من الجانب جوج طيات و نترك الجانب الآخر بدون طي
- ناخدو شوية من الحشوة و نسرحوها على الجانب لي طوينا
- ثم ناخدو الطرف الآخر من العجين و نغطيو بيه الطرف لي فوقو الحشوة
- غادي نحصلو على شكل مستقيمي
- نطويو طية وحدة من كل طرف
- ثم نضع طرف عل الطرف الآخر باش نحصلو على شكل مربع
- ثم نگرسوه شوية حتى نحصلو على المسمن ديالنا في الشكل النهائي
- نكملو الكويرات ديالنا بنفس الطريقة
- بعدما نشكلو المسمن ديالنا كاملا
- ناخدو المقلات ديالنا ندهنوها بالقليل من الزيت أو الزبدة و نسخنوها مزيان
- ثم نديرو فوقها المسمنة ديالنا
- بعدما يبدا يحمار المسمن من واحد الجهة نقلبوه للجهة الأخرى
- و نبقاو نقلبو فالمسمنة ديالنا من جهة لجهة حتى تطيب مزيان
- نستمرو فنفس العملية مع المسمن كامل
و هكذا المسمن عامر ديالنا واجد . نتمنى تعجبكم الشهيوة ديال اليوم و ماتنساوش تشاركوها مع الناس العزاز عليكم. و تابعو صفحتنا على الفيسبوك و الإنستغرام صفحة أذواقي باش يوصلكم كل جديد
بالصحة والعافية
تعليقات
إرسال تعليق