السلام عليكم
مرحبا بكم في وصفة جديدة من وصفات أذواقي، اليوم جبت ليكم طريقة تحضير الحريرة الحامضة على الطريقة المغربية ساهلة و غير مكلفة، ماعليكم غير تبعو الخطوات معيا باش تكون الحريرة ديالكم واجدة
بالنسبة لهاد القياس لي غاندير راه ديال كوكوط كبيرة إذا كنتو باغين تديرو فالكوكوط صغيرة ماعليكم غي تنقسو من القياسات ديال المقادير
المقادير
- زوج بصلات متوسطين الحجم يكونو مشلضين مزيان
- 1 كيلو ماطيشة
- نصف ربطة كرافس مقطعين و مشلضين مزيان
- نصف ربطة قزبر و نصف ربطة معدنوس مشلضين
- كأس كبير من العدس
- زلافة ديال الحمص
- كأس كبير شعرية
- ملعقة ديال السمن و يمكن الإستغناء عليه
- 200 غرام دقيق الفورص
- ملعقة قرفة
- جوج ملاعق كبار مركز الطماطم أو الطماطم المعلبة
- ملعقة كبيرة إبزار
- ملعقة كبيرة خرقوم بلدي
- ملعقة كبيرة زنجبيل مطحون
- ملعقة كبيرة ملح
- حوالي 3 لتر من الماء المغلي
طريقة التحضير
- أولا نسلقو مطيشة بالقشرة ديالها ثم نطحنوها مزيان بالخلاط الكهربائي
- نديرو ثلاث ملاعق كبيرة من زيت الزيتون في الكوكوط و نضعها فوق النار
- نضيف الطماطم لي طحناها و نزيدو حتى الطماطم المعلبة
- نضيف البصل ثم نزيدو القزبر و المعدنوس و الكرافس
- نزيدو الحمص مع العلم ضروري يبات ليلة كاملة في الماء باش يرطاب
- نضيف العدس لي ضروري نكونو رطبناه لمدة لا تقل عن 3 ساعات باش مايتفسخش ليما في الحريرة
- نضيف التوابل ديالنا لي ذكرنا و الملح كذلك
- نخويو عليهم لترين من الماء و نغلق الكوكوط و نتركها فوق النار لمدة نصف ساعة
- نديرو الدقيق ديالنا فواحد القنينة ديال الزجاج كبيرة و نخويو عليه جوج كيسان ديال الماء البارد و نسدو القنينة و نحركو مزيان حتى يختلط الدقيق مع الماء
- بعد مرور نصف ساعة نفتح الكوكوط و نضيف الشعرية
- ثم نضيف السمن و ملعقة ديال القرفة
- نزيدو لتر من الماء المغلي
- نبدأ في إضافة الدقيق المخلوط مع الماء لي حضرناه نضيفوه تدريجيا مع التحريك دون توقف
- نزيدو شوية ديال الملح حينتي زدنا الماء و لكن حسب الذوق
- نخليو الحريرة ديالنا فوق النار واحد الشوية ثم نطفيو عليها
و هكذا الحريرة ديالنا وجدات إذا عجباتكم الوصفة ماتنساوش تشاركوها مع الأصدقاء ديالكم
بالصحة و العافية
تعليقات
إرسال تعليق